¹ 7

Kirchhoff auch geweihet, vndt darbey ein Vermanung gethan, vndt an allen orten gefirmbt, vndt auff aller heiligen Tag im Stifft den vmbgang mit gangen, vndt das heilig hochwurdige Sacrament vmbgetragen vndt den Stab vorher laſſen tragen, vndt die hoe mes vmb 9 vher ſelbſt gehalten vndt geſungen, vnd vnder des mes das gulden Natt vmb gelauffen vndt muſizirtt worden, vndt in der veſper 2 mahl vmb gelauffen vnd vff den Dinſtag Nach Erffurt gezogen..

Anno 1621 Nach aller heyligentag ſintt etliche 100 ſaldaten zu Roß vndt fuß ins Fuldiſche Landt Komen vndt in Behmen gewolt, vndt dem fußvolck zu Margrettenhaun vndt hoff vndt in den ſelbigen Durffern abgedanckt worden, vndt das fußfolck widervmb heim, vndt hin vnd witter gezogen vndt die Reutter Fortgezogen vndt ablaſſen dancken, vndt nach ſchlichter Komen vndt wider zuRück gewolt an das Fundſch Landt, aber das Landtfolck hatt vff gemuſt vndt 100 burger von Fulda, vndt nach dem Neuwen Hoff vndt in der Nacht nach fliten gezogen, die Bauwer haben muſſen Wacht halten am Draſſinnberg, vndt die Reutter ſindt zuRuck gezogen vndt nich vff Fliten Kommen vndt die Burger wider heim gezogen.

Anno 1621 vor dem Attfendt iſt der Byſoff von halberſtadt mit etlich 100 man zu Roß und fuß, vff das ſtettleyn Amell Burg, dem Byſoff von mentz zuſtendig Komen, vndt haben angefangen zu bluntern vndt zu ſtellen, die Kirchen beRaubt, andt die Keilg vndt mesgewandt, alles geſtollen vndt die Burger ſehr vbel fexirt vn beſtollen vndt die geiſtliche auch brandtgeſchatz, vndt die Edell Leudt auch, haben die Burger muſſen ſchweren, ein theill, vndt haben die ſtadt ſelbſt bewagt, haben etliche Burger erſchoſſen, vndt Willens geweſſen in den Stiff Fulda auch zu Komen vndt haben auff der Ammel Borg ſo viell beKomen vnd beudt gemacht, alß 6 tonnen golts, darvff hat der apbt von Fulda Johann fridirig von ſchwallbach, alle ſein auſſchoſſ in die ſtadt Fulda laſſen legen vnder die Burgerſchafft, vndt haben die Burger vndt Bauwer alle mit einander muſſen ſchweren bey dem aptt vndt der ſtadt Fulda zu halten, bey ehr gut vnd blud vff zu ſezen, vndt iſt das Floren Dohr zugemacht wurden undt haben die herrn das folck offen Landt von Radthauß mit brodt gehalten, vndt iſt vmb die ſtudt Mauher allen habenn mit horten gemacht worden, vndt iſt in die Gartten ſchantzen gemacht worden, vndt 2 geſchotz von Ham⸗ melburg in die ſtadt Fulda bracht wurden, vndt alle nacht mehr alß 100 Man Muſſen die ſtadt bewachen vndt hatt der Biſſoff von Wurtzburg, vndt der Beyer Furſt vill 100 man Nach der amellburg geſchickt, vndt ſie laſſen abtreiben, vndt iſt das Landt folck Nach dem Chriſtag wittervmb heimb gezogen.

Anno 1622 in der faſten hatt der Aptt von Fulda Johann fridirig von ſchwolbach 300 Man zu foß in dem Fuldiſche Landt laſſen werben, vndt der Marſchalck auch ſchwalbach, oberſter vber daß Krigsfolck gemacht, vndt das fulck vff die Durffer, Nach Raſtorf nach Geyß undt die Durffer ſelbs herrumb ein Zeit weill gelegen, darnach widerumb in die ſtadt Fulda laſſen Komen, vndt das folck bewendt wurden, vndt bei ein 100 man auß gemuſtert vndt die andern ſaltaden an die Duhr geſteldt, vndt Dag vndt Nacht laſſen Fleiſſig wachen vndt vff das Dinſtag marck laſſen einen Eſell machen, das die ſaltaden darvff muſſen ſitzen wann ſie ettwas hatten verſchaldt, vndt den ſonnabet marck ein ſchnab galgen machen in dem wie ſie baldt 4 Monat lang gedinet haben, ſindt ſie alle mit einander abgedanck worden vndt ihn baßkartten geben worden.

Anno 1622 im Brachmondt iſt der Byſſoff von halber Stadt vnd Knibhauſſen, vndt der graff von ſtirem vff gebrochen, vndt vff dem eißfeldt groſſen vbermudt getreiben, vndt darnach in Stifft Fulda Kommen, vndt in die Durffer hey vmb in Loſiert, vndt zu Heunfeldt die Stad ganz außgeblunttert, vndt etlich Durffer abgebrandt, alß Nemlich Kleinfeldt in grundt abgebrandt, bis vff 6 heuſſer vnd Rottigges auch angeſtecket, aber nicht ſehr gebrandt, undt hatt ein Bauwer einem Reutter Zum Rottiges ein Hand abgehauwen, witterumb haben ſie vff den vmbligenden Durffern alle miteinander gebranttſchatzt, vndt doch alle pferdt wo ſie gelegen haben genommen, mehr alß bey 300 pferdt im Stifft Fuld genomen vnd hinweg gebracht, widerumb haben ſie wollen die Stadt Fuld mit ganzer