6

Anno 1619 iſt eineß burgers ſohn von Fulda der zu Wurzburg geſtuttirt hat heim gezogen zu ſeinem Vatter, wie ehr wider nach Wurzburg hat wollen Reiſſen, ſindt im 2 Juden begenet, ſo hat er einem die ſattel taſchen genommen vndt ehr iſt Furtt ge Ritten vndt der Judt iſt im nach gefolget, zu Motten hatt der Judt die Taſchen witter bekomen, indeſſen iſt der ſtutdentt nach Wurzburg kommen vndt iſt in ein verzweifflung gefallen vndt iſt in einer Nacht in einen Bronnen geſprungen vndt etlich tag darin gelegen daß Nimant hatt gewuſt vnderdeſſen iſt er fundten wurden, vndt zu Wurzburg zu Koll vnd Aſchen verbrandt wordten.

Anno 1620 iſt die Neuw Kirchen zu S. ſeffir vff dem wollen weberß graben witter vmb mit Franzißganern Müng beſetzt worden.

Anno 1620 den 7. Mertz iſt der Chorfurſt von Menz Johann ſchwieckhart alle hier nach Fulda kommen, vndt den 9. witter weg geReiſt, nach Millhauſſen vff den Chorfurſt tag.

Anno 1620 den 20. Merz iſt geweſſen den Dinſtag, iſt der Chorfurſt von Colln vndt Landtgraff Ludtwig, vndt Landtgraff Fritz von Darmſtadt, alhir nach Fulda Komen vndt vber nach bleiben, vndt den 11. wider weg geReiſt, auch nach Miellhauſſen, vff den Chorfurſttag.

Anno 1629 hatt Johann Frittirig von ſchwolbag abtt zu Fulda, daß Jeſuwitterß Kloſter alhier zu Fulda laſſen groſſer Bauwen.

Anno 1620 iſt ein vornemer burger mit Namen andreaß ſollſtatt alhier zu Fulda mit einem Edellman von Wangenheim vff die Jagt geRitten, vnd zu Brumzell einen Drunck gedan, vndt vnuerſehens mit einem Piſtoll von dem Edellmann durg den Kopff zu dott geſchoſſen worden.

Anno 1621 in der Wochen nach oſtern haben ſich etliche 1000 Salttatten, zu Roß vndt Fuß in das Fulſtlich Landt ingezogen vndt hin vndt wider vff die Dorffer inloſſirt, alß nemblich zu Lutten vndt bimbach vnd noch mer Dorffer, vndt haben vbel gehandelt vndt die armen Leudt ſehr vbel fexirt haben viell geſtollen pferdt vndt ander ſagen mehr, vnderdeſſen ſindt 200 ſaltatten zu Roß vndt Fuß in Brumzell Komen vndt auch ſer vbel gehandelt, darvff hat der abtt von Fulda Johan Bernhart den ganzen außſchoß mit bulzen vnd langen ſpiſſen, vndt ander wer mer hei Rein in die ſtadt Fulda laſſen legen, vndt die Burgerſchafft auch darmit laſſen vffmanen vndt fleiſſig laſſen wacht halten vndt ſo vill zuſammen bracht alf 300 vndt die Reutter undt fußKnecht, die vff den Durffern haben gelegen, haben die Reutter wollen die ſtadt an Rennen vndt allſo blundter vndt die FußKnecht haben wollen die Durffer in Brandt ſtecken da haben ſie erfahren, das ſo viell fulcks in der ſtadt Fulda gelegen iſt vndt ſie haben es nich geKundt vndt mit ſchantten abgezogen vndt etlich ſindt in die Stadt gezogen, alß der oberſt Knibhauſſen vndt oberſt blaſios ſonh vndt Frauwenzimmer vndt etlich Reutter mehr, die ſindt im Schloß vff gehalten wurden, biß ſo lang das folck auf dem Fulſdiſchen Landt iſt Komen vndt nach der Zeit Fortgezogen vndt dem oberſten Knibhauſſen ein ſtatlicher gaull geſchenckt worden, aber die ſtatt Fulda iſt aller voll Lanttvolck gelegen vndt die ganze burgerſchafft hatt waſſer muſſen vor die heuſſer Sezen, vndt die Bauwer alle ihr Wagen vndt egen in die Stadt fulda muſſen Furren vndt vff die Langen Brucken.

Anno 1621 Nach Oſtern iſt aber mall Knibhauſſen mit etliche 100 man hir in Stifft fulda an Kommen, vndt quardirt begert aber nich beKomen, doch auf genaden am Frauwenberg ſehr woll geſpeiſt vndt gedrenckt worden, vnndt widervmb nuch dem eiffelt zugezogen mit etliche Fanen zu Roß vndt Fuß, vndt iſt widerumb vill Landt volck hir zu Fulda geweſſen vndt auch wider heimgezogen.

Anno 1621 vor aller heiligen tag iſt ein wey Biſchof allhie nach Fulda Komen vndt zum erſten die Neuw Kapbeln zum Neuwen hoff geweyett, darnach zum Reickers zu babenhauſſen, vff vnſer Lieben Frauwenberg bey Fulda, die Franziſganer Kirg vff dem wollwebersgraben zu Sanct ſeffir darnach vff S. ſiemon vndt Judey das Jeſuwitters Kloſter, das neuw Deill, vnndt den Neuen murmel ſteinern altar vndt vff den Freitag vff den Neuwen