5

Anno 1615 iſt im Francken Landt ein trefflicher gutter Wein gewachſen, in viell Jahren iſt er nicht alß gutt geweſſen.

Anno 1646 den Freitag vor mit Faſten iſt das Waſſer uff der langen brucken einen ſchuh vber die ſchrifft gegangen undt haben die Mull Still geſtanden.

Anno 1616 in der Karwochen ſind ettlich Reutter in das ſchloß Fürſtenneck gefalen und dar in vil Klein notten, gulten Ketten, undt dar von bragt, undt haben einen Jungen edellman erſchoſſen, vndt iſt vff ihrer ſeitten auch einer todt gebliben.

Anno 1616 iſt ein groſſer Raub vndt mortt undt ſtellen umb Fuldt hin vndt wider geweſſen vndt vor⸗ nämlich in der Faſten.

Anno 1616 iſt ein durer ſomer geweſſen, hat ein lange Zeit nicht geregnet, undt iſt ein ſchöner ſomer geweſſen, vndt hatt man die frucht vff Sanct Johannestag angefangen zu ſchneiten.

Anno 1616 auf den Donerstag des Feſtag der geburt Maria den 8. tag Aprils iſt ſchnell ein feuwer auß Kommen zu Fulda im Jeſuwitter ſchull im Koſthauß des Tags umb 3 Vhren ſchnell gegen abent vber gefahren undt noch 2 bauw angeſteckt, aber nich vill ſchaden gethan, aber das feuwer im Koſthauß, daß hat gewaltig ſchaden gethan, undt iſt 300 Mallter frucht verbrandt, undt iſt das ganz Koſthauß im feuwer geſtanden, undt ſindt noch 4 andere Bauw darvon angegangen undt gebrentt, die alle 4 uff derſelben Rien geſtanden haben einem Becker einem Bruckater einem ſchulmeiſter undt einem Koch, aber nicht ſo viell ſchaden gethan aber der meiſt ſchatt iſt geſchehen im Koſthauß, undt iſt ein Leitter mit 6 Perſchon zu brochen, undt ſindt alle her Runder gefallen dar under iſt geweſſen ein Maygiſter undt iſt das Feuwer mit der hilff gotteß undt der menſchen hilff den Abent umb 8 Uhren geſtilt worden, aber eß hat ſich Keiner zu todt gefallen, undt hat die Summa der heuſſer 8 gebrandt, vndt iſt vill verbrandt vndt geſtollen worden.

Anno 1617 hatt ſich Landtgraff Otto vom Heſſen, zu heirffeldt ſelbſt erſchoſſen.

Anno 1617 iſt ein große Brandt hin und wider geweſen, undt im Fuldiſchen Landt, das man in vill Jahren nicht ſo von einem Brandt gehort hat in Dorffern undt ſtetten.

Anno 1616 umb S. Johannestag hat man hier zu Fulda 2 vom Attell ein ſpegt und ein ſchnudenbach vndt einen Reutter eingezogen, die haben gefangen geſeſſen 2 Jahr undt 12 Wochen, vff den Montag Nach ſimplizios hat man dem Reutter den Kopff abgehauben und die 2 vom Attell laſſen ſitzen.

Anno 1618 vff S. Petter vndt Pauelli abent in der Nacht iſt umb 12 vhren eines hier burgers dochter, ſeines handtwerks ein goltſchmit, hier zu Fulda in den Bronen uff dem Dinſtigsmarkt geſprungen, das Nimandt gewoſt hat wie ſie hinnein iſt Komen, uff den Morgen hatt man den Bronen außgefegt, da hatt man ſie darin dott gefunden, vndt uff den abent zwiſchen 10 vnd 11 Uhren begraben wortten.

Anno 1618 vff S. Nicklas abent, hat man alhie zu Fulda, den altten Zendtgraffen Baldaſur Moſſer den Kopf abgehauwen, vndt hatt man in vff einem Karn an daß gericht gefurdt, vndt iſt in einem himpt gericht worden, vndt er hatt 13 Jahr gefangen geſeſſen.

Anno 1618 iſt ein groſſer Krig in Bemen geweſen.

Anno 1619 8 Tag vor S. Michaelli iſt geweſſen der ſonttag, ſindt etlich 100 Reutter bey der amelburck an Komen, vndt haben Zerrung wollen, vndt iſt in nich geben wortten, da haben die Bauwer ſie wollen weg geleit, die Reutter aber, daß wargenomen vndt ſie auf das Feldt gelocket vnd ſie vmb Rent, vndt mit den amell burger vndt den Bauwern geſchlagen, vndt iſt der amelburger vndt bauwer mer alß 100 dott Bliben, erſchoſſen vndt erhauwen, vndt inß Waſſer geſprengt wortten on die andern die noch verwundt ſindt geweſſen, vndt haben die Reutter 2 fan be Kommen vndt dem Pfalzgraffen zugezogen.