Die Chronik angolf Hartungs.

Anno 1607 hat man das Schloſſ zu Fuldta angefangen zu Bauwen.

Anno 1608 hatt eß zu Fuldta im Schloff ein ſchreckligen brandt gegeben, iſt durch den Durwechter auß Komen, vndt den Durm ganz abgebrandt, vndt 2 Klocken ſind verſchmolzen.

Anno 1611 hatt man den Neuwen garten auff der Juden begrebnus zu Fuldta angefangen zu Bauwen, vndt die mauwer darvmb gemacht, iſt von Ihro F. G. Johan Fridrigen gemacht wordten.

Anno 1612 hat man den Frauwenberg angefangen zu Bauwen.

Anno 1613 iſt zu Fulda ein ein erſchrecklicher Wintt geweſſen, vndt hat auff dem Frauwenberg den Neuwen gemachtten Durm abgeriſſen undt nach Niſſig zugefurt vndt hatt ſonſt vill ſchaten gethan an heuſſer vnt wellen.

Anno 1613 iſt zu Fulda ein groß Sterben geweſſen vnd vngefehr bei 400 menſchen geſtorben.

Anno 1614 auff den Montag nach Sanct Antreaſtage, iſt das Waſſer zu Fulda, auff der langen bricken ſo groß geweſſen, das eß hat einen ſchu vber die ſchrifft gegangen, das der müller hat muſſen die pferdt vnd die Kuh vndt die ſchwein, auß dem ſtallen durch das Waſſer an ſeiller muſſen ziehen, vndt das Waſſer vber die pflanſen gartten gegangen, vndt iſt das Waſſer vber den gartten burn gegangen, vndt iſt das Waſſer in den horren Weg gefloſſen, vndt die Wißmull mitten im Waſſer geſtanden, haben die mull 2 tag ſtill geſtanden, iſt das Waſſer vff den Mittwochen witter vmb gefallen. In etlichen 70 Jahren iſt es nicht ſo groß geweſſen, das Waſſer hatt ſonſt viell ſchaten gethan vndt viell hinweg gevirtt.

Anno 1615 iſt hir zu Fulda ein erſchreklich gewitter geweſſen, vff den ſontdag in der Nacht vor Lorrenzigtag, vnd hat am Himmel ein trag geflogen.

Anno 1615 iſt im Fulddiſchgen Landt vndt auff dem fogelßberg ein groſſ Durrung geweſſen, das die bronen darvon ſintt ganz vertrucknet.

Anno 1615 in der ſonnabetts nacht vor Maria Magtelentag, iſt ein erſchrecklich gewitter geweſſen, vndt vff

dem Pettersberg bey Fulda in die Kirgen geſchlagen.

Anno 1615 den erſten Tag apprilif iſt geweſſen den Mittwochen, hat man am hellen ligten tag am himmel einen Routten Kringell mit 3 ſonnen geſehen.

Anno 1615 iſt zu Fulda im heuwmont in der ſonnabetts nacht, ein erſchrecklich gewitter geweſſen, vndt am himmel geſehen wortten ein dauff Stein vndt ein Feuwer hott.

Anno 1615 8 tag vor margretta hat man zu Fulda der ganzen burgerſchafft gebotten, Waſſer vor die duren zuſezen, von wegen etlicher Mortt Wrener die haben wollen die Statt in Brantt ſtoſſen iſt aber gott Lob nicht geſchehen.

Anno 1615 iſt im Fuldiſchen Landt in einem dorff, mit Nahmen ſchintterling, ein Kindt geboren wurden, das hatt gehabt 2 Kopff 4 arm 4 beyn 2 gemeg vndt 1 Nabell vndt iſt balt geſtorben.

Anno 1615 iſt ein Stadlicher ſchöner herbſt geweſſen, iſt in vill Jahren nich alß ſchoͤn geweſſen, vndt hat noch nicht geſchneitt nach dem altten Marttini.

Anno 1615 den 23. October auff den freitag, iſt die erſte Mes vnd Prediget gehalten wortten in der Neuwen Kirchen bim Roden Lewben, vff dem wollwebers graben, vndt iſt woll in 100 Jahren darin Kein gottes⸗ dinſt verricht wurtten, vndt iſt wuſt gelegen, ſie wirdt aber widerumb auff gebauw.

Anno 1615 vff den Freitag vor dem alten Martini tag hat es hier zu Fulda gewetterligt in der Nacht.