V

bornæ, typis Guilelmi Junfermann, Typographi Aulici, anno 1764); tertia, eaque ultima, de mandato Friderici Guilelmi de Ledebur Episcopi ( ex eadem officina, anno 1834) etiamnum in om­nium fere manu habetur. Nunc vero, quum de nova iterum editione quæstio moveretur, illud exe­qui visum est, quod jam dudum desiderabatur: ut scilicet alia pauca Officia Sanctorum, præsertim vetera, simul cum prioribus tamquam propria ex Apostolicæ Sedis licentia assumerentur. Quod quidem causa non caret, multiplici quinimo ratione omnino probabili fulcitur.

Dioecesis etenim Paderbornensis venerabilis et pervetusta, dum ex temporum iniquitate non semel vix salva prodire posse videretur, Divina dispo­sitione Sanctique Liborii Summi Patroni tutela in decursu temporis et ambita et fidelium numero longe excrevit. Anno nimirum vigesimo primo sæculi hujus decimi noni per Bullam, De salute animarum" non solum integræ regiones veterum Diœcesium sublatarum Magdeburgensis, Halber­stadiensis, Merseburgensis, Naumburgensis et Misnensis, sed majores etiam partes tum veteris Archidioecesis Moguntinæ, regio scilicet Erfordien­sis, Thuringiæ et Eichsfeldia, tum Archidioecesis Coloniensis, Ducatus nempe Westfalia et Comita­tus Marcia, Sedi Paderbornensi adscriptæ sunt, ita ut parva prius, inter maximas nunc Germaniæ Dioceses numeretur. Novum hoc vinculum ar­ctioris unionis cum tot fidelium millenis, et hære­