a9
zu Wurzburg zuſtendige ſaldaten, dieſelbige fahn haben ſie ihrem fenrig verehrt undt geſchenckt, daruff der fenrig widerumb den ſaldaten auch etliche Eimer wein geſchenckt undt die fahnen vertrunken undt aller fohll undt doll wurden, undt die burgerſchafft ubell gefetzirt, undt etlich auch wundt geſchlagen undt daruff uff den oſter Monttag das geldt beKomen undt betzaldt wurden unndt uff den Dinſtag undt Mittwochen alle hinweg gezogen widerumb die fahn zu gerffeldt uff den oſtermonttag auch dem fenrig geſchenkt wurden undt vertruncken wurden undt Dinſtag Mittwochen abbezaldt wurden Donerſtag undt Freiſtag hinweg gezogen.
Anno 1623 den lezten Merz iſt geweſſen den freittag 5 Wochen nach faſſennacht hatt mein herr Ihr F. G. Johann Bernhart ſchenk von ſchweintzburg, der herr Dechgant Eberhart Milchling wie auch die Stifftherrn alle mit einander undt auch die in der pfarKirchen die ganze burgerſchafft undt die Kleine Kinder in den ſchullen haben die herrn franziſganer mong das geleidt uff den frauwenberg geben in einer Stattliche prozeſſiion undt darbey das heilig Sacrament mit hinuff getragen wurden undt ſchön darbey muſieirt wurden, widerumb die Kleine Kinder in den ſchullen auch ſchöne geiſtliche Lieder geſungen undt witter mit geigen und harpffen darunder geſtreit vndt die Kinder alle fahn und andere ſchone Werck getragen undt uff gemeltten frauwenberg ein prediget von einem Jeſuwitter gethan wurden undt darnach die hohe meß von dem probſt von der felſch gethan wurden, nach gehal⸗ tener meß haben die Kinder etliche ſpruch müſſen Reden, undt ſindt widerumb in ortnung hinab in die Stadt gezogen, aber mein Herr Ihr F. G. Degant Capittellar hern burgermeiſter Rehdt undt ſchopffen undt andere hern ſindt daroben bleiben bey der mahlzeit undt ſtadliche tracktirt wurden. 3
Anno 1623 8 tag vor pfinſten ſindt etliche Krawatten undt die Vornembſten under ihnen bey die 4 Kompania widerumb in ihr Landt gezogen undt ein Neuwe Kompania ſich widerumb laſſen underhalten undt geyſſell bey Fulda inloſirett und inſ Landt zu heſſen gezogen dem Braunſchweiger von halber Stadt nach, mit ihm zu ſchlagen.
Anno 1623 8 tag vor pfinſten iſt deß Beyerfurſten ſein gantz armmaten bey die 30000 ſtarck Jahmehr, uff gebrochen und in daß Landt zu heſſen gezogen undt ſchliz, lauderbach undt andere ortten mehr inquarttirt undt Generall Tilli ſein quarttirt in der Stadt hirffeldt genohmen und viell Volck zu Ruſſ undt fuſſ in hirffeldt gelegen, auch trom herumb voll undt daß gantz heſſen Landt verderbt, underdeſſen iſt der Generall Dilli einſtmalß in den Stifft gangen und einen franzoſſen mit gehabt, der hatt ein alt ſchrifft funden uber einem gewelb darvor etliche eyſſer thur geweſſen undt alleß uffgemacht wurden, darin Generall tilli einen ſo Stadlichen ſchatz funden, alß nemlich einen biſchoff hott von Berlen und Ettellſtein einen vom Dalwig laſſen machen 2 Crutzifix uff Meßgewandt vol Berllen undt edellſtein ein groſſen Kilg ſilber undt vergolt, ein patten druff ſilber undt ergolt, vill heiligtum undt andere ſachen mehr, bey ein Donnen golſt werdt gefunden mehr alß 15 meßgewandt daß nach fuld geſickt undt 2 Franziſganer mong zu Fuld laſſen hollen undt alle tag laſſen Meſſ undt prediget halten im Stifft Herſfeldt, baldt darnach iſt Generall Tilli mit ſeiner ganzen Armaten uffgebrochen undt nach dem Eiſſfeld gezogen den Braunſchweiger zu ſchlagen. Ar nison
Anno 1623 8 tag vor pfinſtag haben die Becker, alle zu fuld und uff etliche Dorffer trom her 80000 brott jeglich Brott 2 pfund ſchwer muſſen backen und den Beyeriſchen Saldaten zu ſicken', daruff etliche Beyerſche BeckerſKnecht bei die 30 nach Fuld geſickt undt haben muſſen helffen backen undt iſt uff den pfinſtabent pfinſtag und die andere tag, undt die ganze Wochen vill folcks zu Noſſ undt fuſſ durch die Stadt fulda undt hinder der Stadt hergezogen, uff den pfinſtag ſindt 2 Kurnnet durch die Stadt gezogen undt vill wagen undt fuſſfolck durch die Stad alß ins das Landt zu heſſen, uff den pfinſt Monttag iſt zu fuld ein Krawatten hochzeit geweſſen undt wie ſie haben wollen in ihr quarttir Reitten ſeint ſie Streidig wurden und ſich ſehr gehauwen undt einer dott gehauwen wurden, iſt geweſſen ein fahn Juncker und uff den Donnerſtag nach pfinſtag zu fuld uff den Neuwen Kirchhoff begraben wurden.
2