ſolt den Egmont als er von den Spaniern gefangen war, alſo angeredet haben: Du yunger Schelm, ſiheſt du yetz, das es dir nicht beſſer wirt geen, weder deinem Vatter.

So ſoll der Fugger auch vorhin des von Campany Haus geplündert haben vnnd auf deß von Campany Roß durch Annttorf Spacieren Ritten, derhalben iſt Ime der Champany ſo vheindt,

So ſoll er auch zu Bergen in abſein des Herrn Prinzen Haus oder Pallaſt ganns verdeſtruiert vnnd verdorben haben,

Dieſes alles vnnd vil meer legen ſy Ime dem Fugger auf vnnd kan dannoch wol nicht alles whar ſein vnnd laſſen ſich die von Brüſſel vnnd ſonnſt die meiſten tail von den ſtaaden dunk⸗ hen, Er werde nit mit dem Leben dauon khomen,

vmb abferttigung vnnd anttwort auf meines genedigen Für⸗ ſten vnnd Herrn Schreiben hab ich lang ſollicitiert vnnd be⸗ ſchwerlich bekhomen, habs aber von den gemeinen Staaden be⸗ khomen, der von Champany vnd der von Hes haben geſagt, es ſey nit nötig, daß Sy anntwortten, dieweil die Staaden in gemain antwurten,

Der Prinz geet alle tag zwaymal zu Rade mit den anndern Staaden auf das Statthaus, die von Brüſſel thuen dem Prinzen groſſe Eer an vnnd wachen tag vnnd nacht vor ſeinem Pallaſt vnnd gelaiten in, wohin er will, die weiber auf der Gaſſen fallen nider auf Ir Knie, wann der Prinz vorüber geet vnnd volden Ir Hende, Summa, ſy eren In als wer er Gott,

Die von Brüſſl haltten hefftig an, das man den Prinzen zum General Gubernator des Landes ſoll machen, die Geiſt⸗ lichen Herrn, welche vnder den Staaden ſeyn, ſein dem zuwi⸗ der vnnd die Brüſſler ſagen, ſo ferne ſy es nicht zuelaſſen, ſo wollen ſy die geiſtlichen Perſonen, die vnnder den Staaden ſein, einmal zum Stadthauß herabwerfen vnnd zu Tot ſchlagen,