354

zu Maſtricht hat man mich abermals beſuecht vnnd zu Valckhenburg,

Von Maſtricht aus auf Brüſſel den ganntzen weg aus ligt es voller Soldaten, Wallonen vnnd hoch⸗Teutſchen aber ver⸗ ſträet, die hochteutſchen ſein Eberſteiniſche Knecht geweſt vnnd Scharmützlen tückhe mit den Wallonen vnnd die Wallonen die⸗ nen dem von Lumme,

Von den Wallonen geſchicht groſſe Schenderey, Raub vnnd Mörden vnnd iſt ſelten ein tag es werden kaufleuth abgelocht vnnd etlich ermördet, Alſo iſt es an die orter geferlich raiſen allein, dorumb hab ich offtermal teutſche Soldaten müeſſen von einem dorff zum anndern mit nemen vmb der wallonen Schel⸗ merey,

Die Paurn ſeindt maiſtentail aus den dörffern verloffen. onnd die Ackher ligen vil vngebauet, die aber bliben ſein, wann Sy wollen pawen oder plogen, ſo nemen In die Wallonen die roß aus den Plog vnnd ſchlagen die Pawrn zu Tod,

Ich bin durch ein Stettlein geritten das heiſſet Tyne, alda ein viertl Meyl daruon haben die Wallonen einen Kaufman abgeblacht ſambt einem brabantiſchen wagen vnnd haben dem Kauffman Sex Tauſent gulden genomen vnnd in ſer verwundt, ich hab in geſehen vnnd fürcht er habe nit lang darnach gelebt,,

Diß alles machet geſchwinde deure zeitt in den Lannden vnnd wann ſchon die armen Paurn vnnd Kauffleut geen Brüſſl khomen vnnd klagen So gibt man zu anntwort, ſy müeſſen Pa⸗ tientie haben es khünde auf dißmal nicht gebeſſert werden, der⸗ halben iſt Rauben vnnd Mörden vnnd ſonſt alle Schelmerey in den Lannden frey, die Paurn ſagen aber laut, es ſey kain mal ſo vbel geſtannden als die Spanier da waren, als es yetz alda zuegeeth.