Lectori benevolo.
Quum Sacrorum Rituum Congregatio distributionem syllabarum in Tonis Psalmorum faciendam arbitrio cantorum permiserit atque prohibuerit, ne in libris choricis quos ipsa curavit, numeri vel quælibet alia signa ad indicandam syllabarum distributionem adjicerentur, singulos Versus Psalmorum ad Vesperas, Matutinum et Laudes Officii Defunctorum in hoc libello intra lineas perpendiculares disposui. Interdum littera vocalis crassioribus typis ad impellendam vocem excuditur, præsertim si in cantandis melodiis accentus verborum in dubitationem aut difficultatem vocetur. Hoc modo error numquam eveniet adjectis etiam melodiis scilicet Tonis Psalmorum pro unoquoque Versu.
De rationibus in distribuendis et dividendis syllabis conferatur Introductio ad ,, Psalterium Vespertinum", quod continet singulos Psalmos Vesperarum secundum Tonos in Antiphonario Romano præscriptos.
Franc. Xav. Haberl.